Облыстық денсаулық сақтау басқармасы басшысының ана мен бала денсаулығын қорғау жөніндегі орынбасары Мирзанова Мая Миранбайқызы облыстық перинаталдық орталығында болып, бөлімшелердің қызметін аралады.
Аралау кезінде алдымен әйелдер кеңесі бөліміне барып, жаңадан алынған Voluson Signature 20 ультрадыбыстық зерттеу аппаратының жұмысымен танысты. Сондай-ақ реанимация бөлімінде ауыр жағдайдағы пациенттің жағдайын бақылап, босану блогындағы бассейн мен джакузи сынды заманауи мүмкіндіктерді көрді. Бұдан бөлек, неонаталды блокқа барып, жоғары тәуелділіктегі нәрестелерге көрсетіліп жатқан медициналық көмектің барысымен танысты.
Сонымен қатар облыстық перинаталдық орталығында 2025 жылдың қорытындысына арналған есептік жиналыс өтті. Жиынға басқарма басшысының орынбасары, орталықтың бас дәрігері мен оның орынбасарлары, бөлім меңгерушілері, дәрігерлер, аға акушерлер мен аға мейіргерлер қатысты.
Жиналыс барысында перинаталдық орталықтың бас дәрігері 2025 жылы атқарылған жұмыстар мен алдағы міндеттер туралы баяндама жасады. Бас дәрігердің емдеу ісі жөніндегі орынбасары Гүлвира Асылбекқызы емдеу саласы бойынша, ал неонатология бөлімінің басшысы Ләйлә Бегалықызы неонатология бағыты бойынша есеп берді.
Есептік жиналыс қорытындысында Мирзанова Мая Миранбайқызы орталықтың 2025 жылы атқарған жұмысына оң баға беріп, алдағы уақытта ана мен бала денсаулығын нығайтуға бағытталған кешенді іс-шараларды жүйелі түрде жалғастыруды тапсырды.
